“XX əsrdə qadın aşıq poeziyasının inkişaf meyilləri” mövzusunda elmi seminar
Bakı Dövlər Universitetinin Filologiya fakültəsinin Azərbaycan şifahi xalq ədəbiyyatı kafedrasında “XX əsrdə qadın aşıq poeziyasının inkişaf meyilləri” mövzusunda elmi seminar keçirilib. Seminarda kafedranın əməkdaşları və magistrantları iştirak ediblər. Mövzu ilə bağlı məruzə edən kafedranın müəllimi fil.f.d. Ramiyə İskəndərzadə folklorun böyük bir hissəsinin qadınlar tərəfindən yaradıldığını qeyd edib. Bu nümunələrin müxtəlif janrları – layla, oxşama, ağı, eydirmə, bayatı, nağıl və aşıq tərzində qoşulmuş şeirləri əhatə etdiyi bildirilib. XX əsrdə qadın aşıq poeziyasında özünü göstərən bir sıra yeni meyillərin əsasının hələ XIX əsrdə qoyulduğuna diqqət çəkilib. Aşıq Pəri və Aşıq Bəsti ənənələrinin XX yüzillikdə yeni məcraya yönəldiyi vurğulanıb. Həm el şənliklərində çalıb-oxuyan, həm də özləri söz qoşan yaradıcı sənətkarlardan Bəsti, Badam, Dilşad, Savad, Nabat, Sənəm kimi aşıqların adları çəkilib.
XX əsrin əvvəllərində Aşıq Bəstinin “Qurban bulağı” məclislərində iştirak etdiyi, Aşıq Şəmşirlə birgə toylar apardığı, Ağdabanlı Qurbana müraciətlə şeirlər yazdığı barədə məlumat verilib. Zeynəb Zərbəli qızının, Cahansuzun şeirlərinin ictimai məzmunca zəngin olduğundan bəhs edilib. Şeirlərdə həmçinin təbiət gözəlliklərinin vəsfi, nakam sevgidən doğan kədər, taleyin gərdişinə etiraz motivlərinin əks olunduğundan söhbət açılıb.
Yeri gəldikcə, qadın aşıqlara məxsus bayatı, gəraylı, qoşma nümunələrindən örnəklər səslənib. Qadın aşıqların irsinin toplanılmasında Mir Abbas Mirbağırzadə, Əzizə Cəfərzadə, M.Əhmədov, S.Paşayev kimi tədqiqatçıların xidmətlərinə qiymət verilib.
Sonra mövzu ilə bağlı çıxışlar edilib, məruzəçiyə suallar ünvanlanıb. Elmi seminar müzakirələrlə başa çatıb.
