Xocalı soyqırımının 33-cü ildönümü qeyd olunub
BDU-nun Filologiya fakültəsində Tələbə Gənclər Təşkilatının və Tələbə Həmkarlar İttifaqı Komitəsinin birgə təşəbbüsü ilə Xocalı soyqırımının 33-cü ildönümünə həsr olunmuş “Xocalı - qan yaddaşımız” tədbir keçirilib. Tədbir Dövlət Himninin səsləndirilməsi, ölkəmizin ərazi bütövlüyü və suverenliyi uğrunda canlarından keçmiş şəhidlərimizin əziz xatirəsinin bir dəqiqəlik sükutla yad olunması ilə başlayıb.
Filologiya fakültəsinin sosial məsələlər və tələbələrlə iş üzrə dekan müavini Anar Fərəcov açılış nitqi ilə çıxış edərək, ermənilərin azərbaycanlılara qarşı törətdikləri qanlı cinayətlərin tarixindən, o cümlədən Xocalı soyqırımının başvermə səbəbləri və onun doğurduğu ağır nəticələrdən, bu qanlı aksiyaya hüquqi-siyasi qiymətin verilməsi və onun dünya ictimaiyyətinə layiqincə çatdırılması istiqamətində görülən mühüm işlərdən söz açıb, Müzəffər Ali Baş Komandan cənab İlham Əliyevin rəhbərliyi altında Azərbaycan xalqının qazandığı parlaq qələbə ilə şəhidlərimizin qanlarının yerdə qalmadığını vurğulayıb. Bildirib ki, 2023-cü ilin sentyabr ayında birgünlük lokal xarakterli antiterror əməliyyatında Azərbaycan Ordusunun qəhrəmanlığı sayəsində tarixi torpaqlarımız, o cümlədən Xocalı rayonu işğaldan azad olunub və 2023-cü il oktyabrın 15-də Xocalıda Azərbaycan Bayrağı ucaldılıb. Hazırda Xocalıda həyata keçirilən mühüm quruculuq işləri, o cümlədən “Xocalı şəhərində Xocalı Soyqırımı Memorial Kompleksinin yaradılması haqqında” Azərbaycan Respublikası Prezidentinin 25 fevral 2025-ci il tarixli Sərəncamı tarixi Zəfər nəticəsində əldə olunan qələbənin böyük təntənəsidir.
“Azərbaycan ədəbiyyatında Xocalı mövzusu” adlı məruzə ilə çıxış edən BDU-nun Azərbaycan ədəbiyyatı tarixi kafedrasının dosenti Məti Osmanoğlu müstəqillik dövrü ədəbi düşüncəsində Qarabağ, o cümlədən Xocalı mövzusunun bədii inikasından, bu istiqamətdə yazılmış mühüm əsərlərdən söz açıb. Bildirib ki, Xocalı faciəsi və Qarabağ müharibəsi mövzusunda yazılmış ən gözəl əsərləri fərqləndirən başlıca cəhəti insanın taleyinə həssaslığın, torpağa və yurda olan sevginin ifadəsində daha aydın görmək olar. Bu baxımdan Esmira Məhiqızı, Aqil Abbas, Zemfira Məhərrəmli və başqa ədiblərin yaradıcılığından söz açan məruzəçi qeyd edib ki, Xocalı faciəsinin bədii ədəbiyyatda işıqlandırılmasının son dərəcə ehtiyat tələb edən cəhətlərindən biri də bu mövzunun məktəblilərə, gənc nəslə düzgün təqdim edilməsidir: “44 günlük Vətən müharibəsində qəhrəman Azərbaycan gəncliyi Qarabağı nifrət və kin gücünə deyil, öz yurdumuza, vətənimizə, yaddaşımıza, yaddaşımızda yaşatdığımız dəyərlərimizə məhəbbət gücünə xilas elədi. Bu, həm də gəncliyimizin yiyələndiyi müasir elmin, intellektin, dünyanı heyrətə gətirən texnologiyanın və hərb peşəkarlığının qələbəsidir... Heç şübhəsiz ki, qarşımızda açılan geniş üfüqlərdə qalib millət mövqeyini ifadə edəcək ədəbiyyatımız fərqli poetik rənglər və çalarlar qazanacaq, mənəvi varlığımızı bütün zənginliyi, incəlikləri ilə əks etdirəcək, yaşayıb şahidi olduğumuz tarixdəki təzadları, təzadlarla dolu insan xarakterlərini və talelərini göstərmək onun ən birinci işi olacaq”.
Tədbir tələbələrin çıxışları il davam edib.
