Xalq şairi Fikrət Qocanın 90 illiyinə həsr olunmuş tədbir keçirilib
BDU-nun Filologiya fakültəsində Tələbə Gənclər Təşkilatının təşəbbüsü ilə Xalq şairi Fikrət Qocanın 90 illik yubileyinə həsr olunmuş tədbir keçirilib.
Tədbiri giriş sözü ilə açan Filologiya fakültəsinin Sosial məsələlər və tələbələrlə iş üzrə dekan müavini Anar Fərəcov Fikrət Qocanın mənalı ömür yolundan və zəngin ədəbi-bədii yaradıcılığından danışaraq, şairin şeirlərində Vətənə məhəbbətin, vətənpərvərlik duyğularının saf təcəssümünün öz əksini tapdığını bildirib.
Azərbaycan ədəbiyyatı tarixi kafedrasının müəllimi, filologiya üzrə fəlsəfə doktoru Yeganə Xanlarova Fikrət Qocanın həyatı və fəaliyyəti barəsində geniş məlumat verib, ötən əsrin 60-cılar nəslinin poetik axtarışları və novatorluğu ilə daim seçilən nümayəndəsi Fikrət Qocanı fədakar ziyalı, fəlsəfi-intellektual təfəkkürə malik, milli, çağdaş ruhlu şair kimi xarakterizə edib.
Tədbir tələbələrin çıxışları ilə davam edib. Filologiya fakültəsi Tələbə Gənclər Təşkilatının sədri Hümbət Bədəlov “Qalacaq” adlı məruzə ilə çıxış edib, SABAH qruplarının III kurs tələbəsi Fidan Mikayılzadə və Filologiya fakültəsinin II kurs tələbəsi Aysu Türkel şairin şeirlərini səsləndirib, “Mədəniyyət” klubunun sədri Nazim Həsənli və həmin klubun üzvü Nihad Nəsirli “Payız gəldi” mahnısını ifa ediblər. Sonda ədibin yaradıcılığından bəhs olunan videoçarx izlənilib.
