Türkiyəli tələbələr Zəfər Gününə həsr olunmuş tədbirdə
BDU-nun hazırlıq sektorunda təhsil alan türkiyəli tələbələr Filologiya fakültəsinin Azərbaycan dili və ədəbiyyatının tədrisi metodikası kafedrasının dosentləri - Məhbubə Qurbanova, İradə Şəmsizadə və Şəhla Əliyevanın rəhbərliyi ilə İ.Əbilov adına Mədəniyyət Mərkəzinin və Cəfər Cabbarlının ev-muzeyinin birgə təşkil etdikləri 08 Noyabr - Zəfər Gününə həsr olunmuş tədbirdə iştirak ediblər.
Tədbirdən öncə müəllimlər və tələbələr I Fəxri xiyabanda Azərbaycan xalqının ümummilli lideri Heydər Əliyevin məzarını ziyarət edib, qəbri üzərinə gül dəstələri düzüblər.
Azərbaycan və Türkiyə bayraqları ilə tədbirə qatılan tələbələr Səməd Vurğunun “Azərbaycan”, Bəxtiyar Vahabzadənin “Azərbaycan-Türkiyə” şeirlərini səsləndirib, Mehmet Akif Ərsoyun “İstiqlal marşı”nı, İhsan Ozanoğlunun “Çanaqqala içində”, Əhməd Cavadın “Çırpınırdı Qara dəniz”, həmçinin sözləri və musiqisi Cəfər Cəbbarlıya məxsus olan “Türk sağ ikən yurduma əl vurulmaz” mahnılarını ifa ediblər.
Türkiyəli tələbələrin vətənpərvərlik ruhundakı çıxışları iştirakçılar tərəfindən böyük maraqla qarşılanıb və tədbirin təşkilatçıları belə yüksək hazırlığa və təşkilatçıların dəvətini qəbul etdiklərinə görə Azərbaycan dili və ədəbiyyatının tədrisi metodikası kafedrasının əməkdaşlarına təşəkkürlərini bildiriblər.
