Tanınmış yazıçı-jurnalist Varis Yolçuyevlə görüş keçirilib
Bakı Dövlət Universitetinin Filologiya fakültəsində “Söz” Yaradıcılıq Birliyinin təşəbbüsü ilə tanınmış yazıçı, Əməkdar jurnalist, Rusiya Yazıçılar İttifaqının, Azərbaycan Yazıçılar Birliyinin, Beynəlxalq Yazıçılar Gildiyasının üzvü Varis Yolçuyevlə görüş keçirilib. Görüşdə fakültənin professor-müəllim heyəti və tələbələr iştirak ediblər.
Tədbiri giriş sözü ilə açan Azərbaycan ədəbiyyatı tarixi kafedrasının dosenti Məti Osmanoğlu BDU-nun Filologiya fakültəsinin məzunu olan tanınmış yazarın ədəbi yaradıcılığı haqqında geniş məlumat verib, xüsusilə onun “Qızıl cib saatı” romanınının ədəbi məziyyətlərini müasir ədəbi proses baxımından yüksək qiymətləndirib, fakültənin dəvətini qəbul etdiyi üçün qonağa təşəkkürünü bildirib.
Sonra söz yazara verilib. “Bestseller yazmağın sirləri” mövzusunda çıxış edən Varis Yolçuyev tələbələrə ədəbi yaradıcılığın metodları, mühüm sirləri, psixoloji və sosialoji məqamları haqqında geniş söz açıb, yaradıcılıq zirvəsinə gedən yolda qarşıya çıxan çətinliklərə mərdliklə sinə gərməyin və gərgin əməyin nəticəsinin şərəfli ömür olduğunu diqqətə çatdırıb.
Sonra qonaq auditoriyanın suallarını cavablandırıb, tələbələrə imzalı kitablarını hədiyyə edib, onlara gələcək fəaliyyətlərində uğurlar arzulayıb.
