Samirə Əsədlinin “İngilis dilində işgüzar və akademik kommunikasiya-1” fənnindən açıq dərsi
BDU-nun Filologiya fakültəsinin “Filologiya (Azərbaycan dili və ədəbiyyatı)” ixtisası üzrə I kurs Fl-183-184-cü qrupunda İngilis dili (Humanitar fakültələr üzrə) kafedrasının saathesabı müəllimi Samirə Əsədlinin “İngilis dilində işgüzar və akademik kommunikasiya-1” fənnindən açıq məşğələ dərsi keçirilib. Açıq dərsdə İngilis dili (Humanitar fakültələr üzrə) kafedrasının müdiri, dosent Bəylər Hacıyev, İngilis dili (Humanitar fakültələr üzrə) kafedrasının müdirinin müavini, baş müəllim Mürsəlov Rizvan iştirak ediblər.
Uilyam Şekspirin həyat və yaradıcılığına həsr olunmuş məşğələdə fəal (interaktiv) dərsin mərhələlərinə əməl olunaraq tələbələr arasında motivasiya xarakterli sorğu aparılıb, mövzu barəsində onların araşdırıcılıq bacarıqlarını inkişaf etdirən müzakirə mühiti yaradılıb.
Fənn müəllimi məşğələ dərsini jurnalı yoxlamaqla başlayıb, ardınca tələbələrin əvvəlki biliklərini yoxlamaq və fəallığını artırmaq üçün “Brainstorming ( Beyin həmləsi) metodundan istifadə edib. Daha sonra dərs, müəllimin hazırladığı informativ təqdimatla davam edib. Təqdimatın ardınca ev tapşırıqları yoxlanılıb, dərslə bağlı suallar verilərək tələbələrin mövzunu hansı səviyyədə mənimsədikləri müəyyənləşdirilib. 2 tələbə Uilyam Şekspirlə bağlı öyrəndikləri əlavə məlumatları qrup yoldaşları ilə paylaşıb və yoldaşlarının suallarını cavablandırılıb.
Bundan sonra dərs Uilyam Şekspirin tragediyaları haqqında ətraflı məlumat verən video təqdimatla davam edib. Videonu izləmədən öncə tələbələrin videoda qarşılaşa biləcəyi çətin sözlər və mənaları izah edilib və video bitdikdən sonra yönləndirici suallarla uşaqların videodan nələr öyrəndikləri araşdırılıb.
Dərs prosesi tələbələrin 6 qrupa bölünməsi və Şekspirlə bağlı hazırlanmış krosvordun işlənilməsi ilə davam edib. Qruplar krosvordu tamamladıqdan sonra cavablar yoxlanılmış, səhv cavablar düzəldilmişdir. Son olaraq dərs müddətində öyrənilən bütün materiallar sorğu-sual əsnasında təkrar edilmiş və dərsdə fəal iştirak edən tələbələr qiymətləndirilib.
Müəllimin və tələbələrin verdiyi suallar və onların cavablandırılması mövzunu tam açıqlamağa, bütün aspektləri işıqlandırmağa imkan verib. Tələbələr dərsə hazırlıqlı gəlməsi dərsin interaktiv keçməsinə zəmin yaradıb. Dərs müddətində texnologiyanın imkanlarından istifadə edilməsi dərsi daha maraqlı edib.
Samirə Əsədlinin açıq dərsi kafedranın iclasında müzakirə olunaraq elmi-nəzəri və metodiki baxımdan yüksək səviyyəli dərs kimi qiymətləndirilib.
