Bakı Dövlət Universiteti Filologiya fakültəsi

Rumıniyanın Alexandru İoan Cuza İasi Universitetinin Ədəbiyyat fakültəsinin professoru Alexandra Chiriac BDU-nun Filologiya fakültəsinin “Filologiya (ingilis dili və ədəbiyyatı)” ixtisası üzrə III kurs tələbələri ilə görüşüb. Öncə fakültə rəhbərliyi ilə görüşən qonaq hər iki universitet arasında elm və təhsil sahəsində əməkdaşlıqdan məmnunluq duyduğunu bildirib, xüsusilə filologiya elmləri sahəsində müəllim və tələbə mübadiləsinin mühüm əhəmiyyət daşıdığını vurğulayıb. 
Sonra professor Alexandra Chiriac fakültə tələbələri ilə görüşüb. O, İoan Cuza İasi Universitetinin tarixi, müəllim və tələbə kontingenti, burada təhsil almaq və elmi fəaliyyətlə məşğul olmaq imkanları haqqında geniş məlumat verib, dilçilik və ədəbiyyatşünaslıq sahəsində qarşılıqlı əməkdaşlığın həm tələbələr, həm də professor-müəllim heyəti üçün gələcəkdə faydalı olacağına ümidvar olduğunu bildirib. Qeyd olunub ki, əsası 1860-cı ildə qoyulmuş Rumıniyanın Alexandru Ioan Cuza Iasi Universitetində 25000  tələbə təhsil alır. Universitetdə 15 fakütədə müxtəlif ixtisaslar üzrə kadr hazırlığı həyata keçirilir.
Sonra qonaq tələbələrin suallarını cavablandırıb. 
Qeyd edək ki, 2022-ci ilin yanvar ayında Bakı Dövlət Universiteti ilə Alexandru Ioan Cuza Iasi Universiteti arasında imzalanmış Erasmus mübadilə protokolu əsasında hər iki ali təhsil müəssisəsi elm və təhsil sahəsindəki əməkdaşlığını uğurla davam etdirir. Həyata keçirilən əməkdaşlığın məqsədi BDU-nun Alexandru İoan Cuza İasi  Universiteti ilə əlaqələrinin inkişaf etdirilməsi, qarşılıqlı təcrübə mübadiləsinin aparılmasıdır.