Professor Mirvari İsmayılova Azərbaycan dili və nitq mədəniyyəti kafedrasının qonağı olub
Azərbaycan Dövlət Pedaqoji Universitetinin Filologiya fakültəsinin Müasir Azərbaycan dili kafedrasının professoru, filologiya elmləri doktoru Mirvari İsmayılova Bakı Dövlət Universitetinin Filologiya fakültəsinin Azərbaycan dili və nitq mədəniyyəti kafedrasının qonağı olub. Mirvari İsmayılova kafedra əməkdaşlarına Azərbaycan dilində işgüzar və akademik kommunikasiya fənninə aid yazdığı vəsait haqqında məlumat verərək qeyd edib ki, fənnimizin əsas məqsədi tələbələrə qloballaşma şəraitində Azərbaycan dilinə Dövlət qayğısı haqqında məlumat vermək, onlarda kommunikasiya və ünsiyyət anlayışları, kommunikasiyanın forma və funksiyaları, kommunikasiya səviyyələri haqqında və digər məsələlər haqqında təsəvvür yaratmaqdan ibarətdir. Nəzəriyyə və təcrübənin vəhdəti prinsipinə əsaslanaraq, elmi yaradıcılığın müxtəlif formalarının təbliğ edilməsi, nəzəri bilikərin möhkəmləndirilməsi, təcrübi vərdişlərin daha da inkişaf etdirilməsinin təmin edilməsi məqsədilə təşkil olunmuş kafedra yığıncağında müəllimlərin sualları cavablandırılıb, mövzuya dair fikir mübadiləsi aparılıb. Aktual və maraqlı çıxışlarla baş tutan müzakirəyə və dəvətə görə qonaq professor-müəllim heyətinə təşəkkürünü bildirib.
