Bakı Dövlət Universiteti Filologiya fakültəsi

BDU-nun Filologiya fakültəsinin Azərbaycan dilçiliyi kafedrasında “Onomastik sistemdə müasir tendensiyalar” mövzusunda elmi seminar keçirilib. Kafedra müdiri professor Tofiq Hacıyev seminar mövzusunun əhəmiyyətinə toxunaraq  son illərdə cəmiyyətdə baş verən aktiv ictimai-siyasi proseslərin, milli mədəni tendensiyaların yeni adların meydana çıxmasına səbəb olduğunu və onomastik sistemin zənginləşməsinə təsir göstərdiyini vurğulayıb.
Mövzu ilə bağlı məruzə edən kafedranın professoru Reyhan Həbibli advermə sahəsinin araşdırılmasının müasir dövrdə dinamik şəkildə inkişaf etdiyindən, bunun onim tiplərinin və nominasiya prinsiplərini şərtləndirən müxtəlif faktorların qarşılıqlı təsiri ilə bağlılığından danışaraq, xüsusilə ekstralinqvistik amillərin təsiri ilə Azərbaycan onomastik sistemində son illərdə müxtəlif hadisələrin baş verdiyini, yeniliklərin antroponimik, urbanonimik, bütövlükdə toponimik, habelə digər sistemlərdə öz əksini tapdığını qeyd edib.
Kafedranın dosenti Fikrət Şiriyev mövzunun aktuallığının qeyd olunan faktların milli onomastik sistemdə adlandırma proseslərinə təsirinin müəyyənləşdirilməsi ilə bağlılığı haqqında məlumat verib. 
Sonra mövzu ilə bağlı çıxışlar edilib, məruzəçiyə suallar ünvanlanıb. Seminar müzakirələrlə yekunlaşıb.