“Nəbi Xəzri dünyasına səyahət” adlı tədbir
Dekabrın 28-də BDU-nun Filologiya fakültəsinin Azərbaycan dili və ədəbiyyatının tədrisi metodikası kafedrasının əməkdaşları - dosent Şəlalə Abdullayeva və baş müəllim Gülümsər Abbasovanın rəhbərliyi, Rus dili və ədəbiyyatı müəllimliyi ixtisası üzrə I kurs, FL-168-ci qrup tələbələrinin təşkilatçılığı ilə “Nəbi Xəzri dünyasına səyahət” adlı ədəbi-bədii tədbir keçirilib.
Tədbirin əvvəlində görkəmli şairin ömür yolundan bəhs edilən videoçarx nümayiş olunub. Sonra tədbirin aparıcıları Aynur İsgəndərova və Ülvi Muradov ədibin həyat və yaradıcılığı haqqında ətraflı məlumat veriblər.
Ədəbi-bədii gecədə tələbələrdən Nəzrin Məmmədova və Zemfira Ələkbərova tanınmış Azərbaycan bəstəkarlarının şairin sözlərinə bəstələdikləri mahnıları ifa edib, Nəzrin Məmmədova, Səbinə Ələkbərova və Nurcan Cəfərlinin təqdimatında “Torpağa sancılan qılınc” əsərindən bir hissə səhnələşdirilib, Qumruxanım Lütfəliyeva, Ayan Əmirxanova, Aysu İsmayılova, Səbinə Ələkbərova, Nurcan Cəfərli və Ülvi Muradov ədibin şeirlərindən nümunələr səsləndiriblər. Bədii hissənin yekununda FL-168-ci qrup tələbləri M.Maqomayevin şairin sözlərinə bəstələdiyi “Azərbaycan” mahnısını kollektiv şəkildə ifa ediblər.
Sonda Azərbaycan dili və ədəbiyyatının tədrisi metodikası kafedrasının müdiri, professor Mətanət Abdullayeva çıxış edərək, keçirilən tədbirin əhəmiyyətini və tələbələrin hazırlığını yüksək qiymətləndirib, ədəbi-bədii gecənin təşkilatçılarına və iştirakçılara təşəkkürünü bildirib.
