Bakı Dövlət Universiteti Filologiya fakültəsi

Bakı Dövlət Universitetinin Filologiya fakültəsinin Azərbaycan şifahi xalq ədəbiyyatı kafedrasında “Nağılların bəzi heyvan personajları Müdrik Qoca arxetipinin örnəkləri kimi” mövzusunda elmi seminar keçirilib. Seminarda kafedranın əməkdaşları və magistrantları iştirak ediblər. 
Mövzu ilə bağlı məruzə edən kafedranın dosenti Kəmalə İslamzadə arxetiplər nəzəriyyəsinin psixoanalitiklər tərəfindən irəli sürüldüyünü və insan xarakterlərinin müxtəlif psixoloji tiplərini ehtiva etdiyini bildirib. K.Q.Yunqun 12 arxetip müəyyənləşdirdiyi və onları elmi ictimaiyyət üçün əyaniləşdirmək məqsədi ilə hər kəsin uşaqlıqdan tanıdığı folklor obrazlarına müraciət etdiyi nəzərə çatdırılıb. Müdrik Qoca arxetipinin xüsusiyyətləri, funksiyaları, paradiqmaları barədə müfəssəl informasiya verildikdən sonra müxtəlif xalqların panteonunda müdriklik tanrılarının su ünsürü ilə əlaqəli olduğu diqqətə çatdırılıb. Müdrik Qocanın atributu olan kitabın onun intellektuallığını göstərdiyi vurğulanıb. Bu arxetipi təmsil edən obrazların xarakterində ilahi başlanğıcla demonizm xüsusiyyətlərinin bir arada olduğu bildirilib. Bu arxetiplə əlaqəli personajların yalnız yaşlı şəxslər deyil, həm daha cavan, həm də heyvan obrazları ola biləcəyi dəqiqləşdirilib. 
Heyvan personajlarından Çaqqal (“Kəlilə və Dimnə”), Bayquş (“Sirlər xəzinəsi”), Tutuquşu (“Tutinamə”) barədə ətraflı bəhs edilib, onların təfərrüatlı təhlili aparılıb. Bu yazılı abidələrin folklor qaynaqlı olduğu diqqətə çatdırılıb. Müdrik Qoca arxetipinin həm folklor və yazılı ədəbiyyata, həm moda sferasına, həm də incəsənətin digər sahələrinə nüfuz etdiyi bildirilib. 
Məruzə maraqlı slaydla müşayiət olunub. Sonra mövzu ilə bağlı çıxışlar edilib, məruzəçiyə suallar ünvanlanıb. Elmi seminar müzakirələrlə başa çatıb.