“Müasir dövrdə epistolyar üslub və məktubların rolu” mövzusunda elmi seminar keçirilib
BDU-nun Filologiya fakültəsinin Azərbaycan dilçiliyi kafedrası nəzdində “Azərbaycan dilinin tətbiqi məsələləri” ETL-nin böyük elmi işçisi, dosent Lalə Rasim qızı Əfəndiyevanın “Müasir dövrdə epistolyar üslub və məktubların rolu” mövzusunda elmi seminarı keçirilib.
Məruzəçi qeyd edib ki, kommunikayiya prosesində epistolyar üslubun rolu danılmazdır. Ancaq internet şəbəkəsinin yaranması elektron yazışmaların rolunu artırmış, ənənəvi epistolyar mətnləri sıxışdıraraq yeni kommunikasiya vasitəsi yaratmışdır. Məktublar onların müəllifləri haqqında, şəxsiyyəti və həyatlarının müəyyən zaman kəsiyi haqqında məlumat verməklə yanaşı, eyni zamanda, həmin dövrün dil-üslub xüsusiyyətləri haqqında da maraqlı informasiya daşıyır. Bunun əksinə olaraq, elektron məktublar müəyyən standart formalarda tərtib edilməklə kağız üzərində yazılan məktublardakı canlılığı, epistolyar üslubda əks olunan müxtəlif nitq çalarlarını itirir. Məruzəçi çıxışında yekun olaraq bildirmişdir ki, ənənəvi məktublardan, demək olar ki, istifadə edilmədiyi halda, rəsmi elektron məktublar daha çox aktuallaşır və yazılı kommunikasiya prosesində əhəmiyyətli rol oynayır.
