Məhəmməd Füzulinin 530 illiyinə həsr olunmuş qiraət müsabiqəsi keçirilib
BDU-nun Filologiya fakültəsində Tələbə Gənclər Təşkilatının təşəbbüsü ilə dahi Azərbaycan şairi Məhəmməd Füzulinin 530 illiyinə həsr olunmuş qiraət müsabiqəsi keçirilib. Müsabiqənin dəyərləndirmə komissiyasında Azərbaycan dili və ədəbiyyatının tədrisi metodikası kafedrasının müdiri, professor Mətanət Abdullayeva və Azərbaycan ədəbiyyatı tarixi kafedrasının dosenti Məti Osmanoğlu yer alıb.
Fakültə üzrə Tələbə Gənclər Təşkilatının sədri Hümbət Bədəlov açılış nitqi ilə çıxış edərək, M.Füzuli yaradıcılığının Azərbaycan ədəbiyyatı və dili tarixində müstəsna yerindən söz açıb, müsabiqənin şərtləri haqqında məlumat verib.
Qiraət müsabiqəsində ümumilikdə 14 nəfər iştirak edib. Dəyərləndirmə komissiyası üzvlərinin yekun qərarına əsasən, Kəmaləddin Hüseynov I yerə, Validə Bayramlı II yerə, Fidan Sadıqova III yerə layiq görülüb.
Sonra professor Mətanət Abdullayeva və dosent Məti Osmanoğlu tələbələrin çıxışları ilə bağlı təəssüratlarını bölüşüb, gənclərə öz tövsiyələrini verib, onlara uğurlar arzulayıblar.
