“Məhəmməd Füzuli lirikasında məhəbbət” adlı seminar
BDU-nun Filologiya fakültəsi Tələbə Elmi Cəmiyyəti nəzdində “Ədəbiyyat” klubunun təşkilatçılığı ilə “Məhəmməd Füzuli lirikasında məhəbbət” mövzusunda elmi seminar keçirilib. Tədbirdə Türkologiya kafedrasının dosenti Firəngiz Kərimli, “Türkoloji araşdırmalar” ETL-in elmi işçisi Ramil Bayramov və tələbələr iştirak ediblər.
Seminarı giriş sözü ilə açan “Ədəbiyyat” klubunun sədri Nigar Xanəliyeva klubun təşkilatçılığı ilə keçirilən seminarların tələbələr üçün əhəmiyyətindən danışıb, gələcəkdə belə elmi tədbirlərin davamlı olacağını diqqətə çatdırıb.
“Türkoloji araşdırmalar” ETL-in elmi işçisi Ramil Bayramov tələbələrin elmi fəaliyyətlə məşğul olmasını yüksək qiymətləndirib, onları aktual mövzularda elmi məruzələr hazırlayaraq universitet və respublika səviyyəli konfranslarda da aktiv iştirak etməyə çağırıb.
Sonra söz məruzəçiyə verilib. Mövzu ilə bağlı məruzə edən Filologiya fakültəsinin I kurs tələbəsi Hümbət Bədəlov Füzulinin məhəbbət lirikasının poetik özəllikləri haqqında geniş məlumat verib.
Daha sonra mövzu ilə bağlı çıxışlar edilib, iştirakçıların sualları cavablandırılıb.
Sonda Türkologiya kafedrasının dosenti Firəngiz Kərimli tələbənin məruzəsi ilə bağlı fikirlərini bölüşüb, ona öz tövsiyələrini verib, TEC-in nəzdindəki “Ədəbiyyat” klubunun fəaliyyətinə uğurlar arzulayıb.
