“Kommunikasiya anlayışı və kommunikasiya modellərinin təsnifat prinsipləri” adlı elmi seminar
Bakı Dövlət Universitetinin (BDU) Filologiya fakültəsində Azərbaycan dili və nitq mədəniyyəti kafedrasının müdiri, professor İlhamə Hacıyeva professor-müəllim heyətinin iştirakı ilə elmi seminar keçirib. Mövzu ilə bağlı məruzə edən kafedranın müəllimi, filologiya üzrə fəlsəfə doktoru Yeganə Vasif qızı Qəhrəmanlı qeyd edib ki, “kommunikasiya prosesi insanlar arasında yüksək əhəmiyyət kəsb edən məlumat mübadiləsi prosesi kimi qiymətləndirilir. Kommunikasiya anlayışının əsas mənalarının sistemləşdirilməsi; kommunikasiya və ünsiyyət anlayışlarının müəyyənləşdirilməsinə müxtəlif yanaşmalar; kommunikasiyanın funksiyaları; kommunikasiya prosesi, onun elementləri, mərhələləri; kommunikasiya modelləri, əhəmiyyəti, onların təsnifatı prinsipləri; kommunikativ maneələrin səbəbləri, təsnifatı və aradan qaldırılması yolları nəzərdən keçirilir”.
Məruzəçi bildirib ki, kommunikasiya modeli ünsiyyət prosesində baş verən əsas elementləri və qarşılıqlı əlaqələri başa düşməyə və izah etməyə kömək edən komnmunikasiya prosesinin sadələşdirilmiş təsvirini, hər hansı bir quruluş və ya prosesin əsas elementlərini və bu elementlər arasındakı əlaqələri göstərir. Həmçinin zəncirvari prosesin ümumi şəklini verən kommunikasiya modelləri forma, məzmun, funksiyalar, vəzifələr və məqsədlərə görə təsnif edilir. Kommunikasiya elementlərinin iştirakı və istiqamətinə görə ən məşhur modellər: xətti model, qeyri-xətti, çoxölçülü (həcmli), semiotik modelləri nəzərdən keçirilir. Əks əlaqənin xarakterindən asılı olaraq xətti (hərəkət), qarşılıqlı əlaqə (interaktiv) və proses (transaksiya) kimi modellər barədə məlumat verilir. Sonda kommunikasiya növləri müxtəlif meyarlara görə fərqləndirilir.
Sonra məruzəçiyə suallar ünvanlanıb, mövzu ətrafında çıxışlar edilib. Seminar müzakirələrlə yekunlaşıb.
