Filologiya fakültəsinin Tələbə Gənclər Təşkilatı nəzdində “İdeya” və “Kitab” klublarının növbəti təlimləri keçirilib
Martın 6-da BDU-nun Filologiya fakültəsinin Tələbə Gənclər Təşkilatı nəzdində “İdeya” və “Kitab” klublarının növbəti təlimi keçirilib.
Diskussiya şəklində təşkil edilən “İdeya” seminar klubunun təmsilçisi Nərmin Məmmədova “Yaşamağın sirri nədir?” mövzusunda çıxış edib. Sonra iştirakçılar yaşam fəlsəfəsi, yaşamaq uğrunda mücadilə, həyatda xeyir və şər arasında mübarizə, sevinc və kədər, uğur və məğlubiyyət, nikbinlik və bədbinlik kimi məsələlərdən söz açıblar.
“Kitab” klubunun növbəti təlimində isə Səbahəddin Əlinin “Xəz paltolu Madonna” romanı müzakirə olunub. Fakültənin III kurs tələbəsi, klubun təmsilçisi Aytac Hüseynli əsər haqqında ətraflı məlumat verdikdən sonra klub üzvləri romanın ideya-məzmunu və bədii təhlili ətrafında fikir mübadiləsi aparıb, süjet xətti və obrazlar aləmi ilə bağlı çıxışlar ediblər.
Hər iki təlimdə mövzular ətrafında geniş müzakirələr aparılıb, iştirakçıları maraqlandıran suallar cavablandırılıb. Sonda fakültə üzrə Tələbə Gənclər Təşkilatının sədri Həsrət Emçiyev təlimlərin mövzusu ilə bağlı fikirlərini bölüşüb, bütün aktiv tələbələrə təşəkkürünü bildirib.
