Filologiya fakültəsində Zəfər Günü qeyd olunub
BDU-nun Filologiya fakültəsində Tələbə Həmkarlar Təşkilatının təşəbbüsü ilə 8 Noyabr - Zəfər Gününə həsr olunmuş tədbir keçirilib. Tədbir Azərbaycan Respublikasının Dövlət Himninin səsləndirilməsi və Azərbaycanın ərazi bütövlüyü uğrunda şəhid olmuş qəhrəman övladlarımızın əziz xatirəsinin bir dəqiqəlik sükutla yad edilməsi ilə başlayıb.
Giriş sözü ilə çıxış edən Filologiya fakültəsinin Sosial məsələlər və tələbələrlə iş üzrə dekan müavini Anar Fərəcov 44 günlük Vətən müharibəsində əldə olunan qələbəyə gedən şərəfli yoldan, son 30 ildə respublikamızın tərəqqisi və beynəlxalq aləmdə nüfuzunun güclənməsi istiqamətində görülən misilsiz işlərdən, hazırda işğaldan azad olunmuş ərazilərdə aparılan böyük quruculuq işlərindən, bu tarixi Zəfərin qazanılmasında qəhrəman oğullarımızın göstərdikləri şücaətlərdən, həmin dövrdə fakültə tələbələrinin arxa cəbhədəki fəallığından söz açıb.
İngilis dili (təbiət fakültələri üzrə) kafedrasının müdiri professor Abbas Abbasov xalqımızın milli qürur tarixinə çevrilmiş böyük Zəfərin əldə olunmasında Ali Baş Kommandan cənab İlham Əliyevin beynəlxalq səviyyədə həyata keçirdiyi peşəkar siyasətdən, müharibə dövründə igid oğul və qızlarımızın göstərdikləri qəhrəmanlıqlardan, Qarabağın keçmiş tarixi nüfuzunun bərpa olunması istiqamətində uğurla icra edilən böyük layihələrdən danışıb, cənab Prezidentin Qubadlı rayon ictimaiyyəti ilə keçirdiyi görüşlə bağlı təəssüratlarını bölüşüb.
Filologiya fakültəsinin tələbəsi Xanım Əhmədzadə 44 günlük Vətən müharibəsində şəhidlik zirvəsinə uclamış əmisi Famil Əhmədzadənin döyüş meydanında göstərdiyi qəhrəmanlıqlardan, Azərbaycan Silahlı Qüvvələrinin zabiti kimi şəxsi keyfiyyətlərindən, gənc nəslə örnək tərcümeyi-halından, həmçinin dövlətimizin şəhid ailələrinə göstərdiyi xüsusi diqqət və qayğıdan bəhs edib.
Vətən müharibəsi iştirakçısı, BDU-nun Geologiya fakültəsinin I kurs tələbəsi Musa Abbasov torpaqlarımızın işğaldan azad olunması istiqamətində aparılan uğurlu hərbi əməliyyatlardan danışıb, müharibə vaxtı gərgin keçən döyüşlərlə bağlı təəssüratlarını bölüşüb.
Ləman Əliyevanın aparıcılığı ilə keçirilən tədbirin bədii hissəsində Zəfər Gününə həsr olunmuş videoçarx nümayiş olunub, ədəbi-bədii çıxışlar edilib. Tələbələrdən Qaratel İsmayılova, Samirə Haqverdiyeva, Aytən Qarayeva, Aidə Qurbanova, Aynurə Abbaszadə, Cəmilə Quliyeva, Xəyal Topçuyev, Ülviyyə Orucova, Qorqud Məmmədli, Fidan Bəylərova və başqalarının ifasında vətənpərvərlik və qələbə mövzusunda şeirlər və mahnılar səsləndirilib.
