Bakı Dövlət Universiteti Filologiya fakültəsi

BDU-nun Filologiya fakültəsində Rus ədəbiyyatı tarixi kafedrasının təşəbbüsü ilə Novruz bayramına həsr olunmuş “Baharın gəlişi” adlı tədbir keçirilib. Kafedra müdiri professor Ədibə Paşayevanın rəhbərliyi ilə təşkil olunan tədbirdə tələbələr görkəmli Azərbaycan və rus şairlərinin şeirlərini səsləndirib, Novruz adət-ənənələri haqqında ətraflı məlumat verib, müxtəlif mahnılar ifa ediblər.
Tədbirdə BDU-nun rektoru Elçin Babayev müəllim və tələbələri Novruz bayramı münasibətilə təbrik edib, təşkilatçılara təşəkkürünü bildirib. Novruz bayramının dövlət səviyyəsində qeyd olunmasından söz açan rektor qeyd edib ki, Novruz xalqımızın mədəniyyətini, milli-mənəvi dəyərlərini özündə əks etdirən, dünyaya tanıdan qədim el bayramı kimi əcdadlarımızdan bizə miras qalıb. Tarixən milli düşüncə tərzinin formalaşmasında, insanların yüksək əxlaqi dəyərlərinin zənginləşməsində böyük rol oynayan Novruz bayramı özündə paklığı, saflığı birləşdirir və bu adət-ənənələrin gələcək nəsillərə ötürülməsi, ümumən, milli-mənəvi dəyərlərimizin qorunub saxlanılması vacib məsələlərdən biridir.