Fakültə könüllüləri Siyasi Repressiya Qurbanları muzeyində
“BDU könüllüləri” təşkilatının təşəbbüsü ilə tələbələrin maarifləndirilməsi və tarixi irsimizin gənclərə aşılanması məqsədilə Siyasi Repressiya Qurbanları muzeyinə ekskursiya təşkil olunub. Ekskursiyada Filologiya fakültəsinin könüllüləri də iştirak ediblər.
İştirakçılar ilk olaraq muzey bələdçisi tərəfindən qarşılanıb və onlara XX əsrin əvvəllərində Azərbaycanın siyasi mühiti, repressiya dalğalarının səbəbləri və bu proseslərin xalqımıza vurduğu ağır zərbələr haqqında ətraflı məlumat verilib. Könüllülər muzeydə sərgilənən arxiv sənədlərini, fotoşəkilləri və həmin dövrə aid şəxsi əşyaları incələyərək, o dövrdə günahsız yerə həbs edilən, sürgünə göndərilən və həyatını itirən şəxsiyyətlərin taleləri ilə yaxından tanış olublar.
Muzeyin xüsusi guşələrindən birində könüllülər repressiya qurbanlarının məhkəmə qərarları, onların yazdığı məktublar və ailələri ilə olan son ünsiyyətlərini əks etdirən sənədləri nəzərdən keçiriblər.
