Dosent Saidə Mustafayeva açıq dərs aparıb
BDU-nun Azərbaycan dili və ədəbiyyatının tədrisi metodikası kafedrasının dosenti Saidə Mustafayevanın Sosial elmlər və psixologiya fakültəsində “Korreksiyaedici təlim” ixtisasının II kurs 1726-cı qrupunda “Azərbaycan dili və onun xüsusi məktəblərdə tədrisi metodikası” fənnindən açıq dərsi keçirilib. “Xüsusi məktəblərdə savad təlimi sistemi. Savad təlimi dövrü. Savad təlimindən sonrakı dövr” mövzusuna həsr olunmuş açıq dərsdə Azərbaycan dili və ədəbiyyatının tədrisi metodikası kafedrasının dosentləri Rəhilə Quliyeva, Məhbubə Qurbanova, İradə Şəmsizadə və Şəlalə Abdullayeva iştirak ediblər.
Fənn müəllimi məşğələ dərsini jurnalı yoxlamaqla başlayıb, ardınca frontal sorğu aparıb. Müəllimin və tələbələrin verdiyi suallar və onların cavablandırılması mövzunu tam açıqlamağa, bütün aspektləri işıqlandırmağa imkan verib. Tələbələr dərsə hazırlıqlı olublar. Dərs texnologiyanın imkanlarından istifadə ilə slaydlarla müşayiət olunub ki, bu da dərsi daha maraqlı edib. Dərs prosesində fəndaxili, fənlərarası və fənlərüstü inteqrasiyalar həyata keçirilib. Dərsdə diqqəti çəkən maraqlı məqamlardan biri də tələbələrin nitq qüsurlu uşaqlarla görüşərək, onlarla tədris olunan mövzular üzrə keçirdikləri təlimlərin videoçarxlarının təqdim edilməsi olub.
Saidə Mustafayevanın açıq dərsi kafedranın iclasında müzakirə olunaraq elmi-nəzəri və metodiki baxımdan yüksək səviyyəli dərs kimi qiymətləndirilib.
