Dosent Etibar Talıblı açıq dərs aparıb
BDU-nun Azərbaycan şifahi xalq ədəbiyyatı kafedrasının dosenti, filologiya üzrə fəlsəfə doktoru Etibar Əjdər oğlu Talıblının Filologiya fakültəsinin bakalavr səviyyəsinin I kursunda (Fl-183, Fl-184, Fl-185 qruplarında) “Azərbaycan şifahi xalq ədəbiyyatı” fənni üzrə “Mifologiya. Arxaik janrlar” mövzusunda açıq mühazirə dərsi keçirilib. Dərsdə Azərbaycan şifahi xalq ədəbiyyatı kafedrasının əməkdaşları – fil.e.d. Ülkər Nəbiyeva, dos. Məhəmməd Məmmədov, dos. Kəmalə İslamzadə, dos. Könül Həsənova, fil.e.n. Ramiyə İskəndərzadə və kafedranın magistrantları iştirak ediblər.
Dərs müasir tələblərə uyğun aparılıb. Müəyyən tezislər tələbələrə yazdırılıb, sonra onlar geniş şərh olunub. “Mifologiya” termininin bir neçə mənası izah edilib. Miflərin folklorda mifoloji obraz, mifoloji süjet və mifoloji motiv şəklində təzahür etdiyi bildirilib. Xaos və Kosmos anlayışlarından, onlara aid olan obrazlardan danışılıb. Miflərin ənənəvi təsnifatı diqqətə çatdırılıb. Miflərin vaxtilə praktik əhəmiyyət daşıdığı, idraki funksiyaya malik olduğu, cəmiyyətdə insanların birgəyaşayışını təmin etdiyi vurğulanıb. Mif mətnlərindən nümunələr səslənib.
Dərsin ikinci yarısında arxaik janrlardan bəhs edilib. İbtidai təsəvvürlərin həcmcə kiçik ifadəsi olan arxaik janrlar sadalanıb, onların ortaq cəhətinin Magiya olduğu bildirilib. Fövqəlbəşər qüvvələrin köməyi ilə insan taleyinə söz vasitəsilə təsir etməyin Magiya adlandığı qeyd edilib. Ağ və qara magiya anlayışları izah olunub. İnanc, alqış, qarğış, and kimi janrların xüsusiyyətləri sadalanıb. İnancların təlqinedici, yasaqlayıcı, etioloji xarakterə malik qruplarından söhbət açılıb. Andların andiçmə (inandırma) və andvermə (yalvarma) məzmunlu növlərindən bəhs edilib. Yalnız folklordan deyil, eləcə də yazılı ədəbiyyatdan və gerçək həyatdan bu janrlarla bağlı maraqlı örnəklər verilib.
Dosent Etibar Talıblının açıq dərsi kafedranın iclasında müzakirə olunaraq elmi-nəzəri və metodiki baxımdan yüksək səviyyəli dərs kimi qiymətləndirilib.
