“Dədə Qorqud” elmi tədqiqat laboratoriyasının 25 illiyinə həsr olunmuş elmi seminar
BDU-nun Filologiya fakültəsində Azərbaycan ədəbiyyatı tarixi kafedrası nəzdində fəaliyyət göstərən “Dədə Qorqud” Elmi Tədqiqat Laboratoriyasının yaranmasının 25 illiyinə həsr olunmuş elmi seminar keçirilib.
Elmi seminarı giriş sözü ilə açan laboratoriya müdiri Almara Nəbiyeva “Dədə Qorqud” ETL-in 25 illik fəaliyyəti haqqında geniş məruzə ilə çıxış edib. Bildirib ki, “Dədə Qorqud” ETL-in yarandığı ilk dövrlərdə akademik Tofiq Hacıyev, AMEA-nın müxbir üzvü, professor Əliyar Səfərli, AMEA-nın müxbir üzvü, professor Azad Nəbiyev, professor Yusif Seyidov, professor Süleyman Əliyarlı, professor Samət Əlizadə, professor Qara Namazov, professor Pənah Xəlilov kimi görkəmli alimlər burada fəaliyyət göstərib və dastanı müxtəlif istiqamətlərdə araşdıraraq, eposla bağlı bir çox elmi yeniliklərə imza atıblar.
Professor Adil Babayev “Dədə Qorqud” ETL-in fəaliyyəti dövründə Dədə Qorqud dastanlarının öyrənilməsi istiqamətində aparılan araşdırmalar və “Dədə Qorqud dünyası” jurnalının nəşri barəsində məlumat verib.
Seminarda çıxış edənlər laboratoriyada vaxtilə çalışan görkəmli alimlərin araşdırmaları və hazırda aparılan tədqiqatlarla bağlı fikirlərini bölüşüblər.
