“Çağdaş tatar hekayələri antologiyası”nın təqdimatı
BDU-nun Türkologiya kafedrasının magistrantı, Tələbə Elmi Cəmiyyəti nəzdində Türkoloji dərnəyin rəhbəri Məleykə Mirzəlinin tərcüməsində nəşr edilmiş “Çağdaş tatar hekayələri antologiyası” adlı kitabın Tatarıstanın Azərbaycandakı Nümayəndəliyində təqdimatı keçirilib. 31 müasir tatar nasirinin hekayələrindən ibarət olan kitabın redaktoru və ön sözünün müəllifi BDU-nun Azərbaycan ədəbiyyatı tarixi kafedrasının dosenti Məti Osmanoğludur.
Tədbiri giriş sözü ilə açan Milli Məclisin Mədəniyyət Komitəsinin eksperti Əkbər Qoşalı rəhbəri olduğu layihə haqqında məlumat verib və nəşrin əhəmiyyətindən söz açıb.
Tatarıstanın Azərbaycandakı Nümayəndəliyinin daimi nümayəndəsi Murad Qadılşin layihə əsasında tərtib olunmuş bu kitabı mühüm ədəbi-mədəni hadisə hesab edib və kitabın ərsəyə gəlməsində əziyyəti keçən hər kəsə təşəkkürünü bildirib.
Milli Məclisin Mədəniyyət komitəsinin sədri, kitabın məsləhətçisi Qənirə Paşayeva geniş məzmunda çıxış edərək, ərsəyə gələn bu nəşrin Azərbaycan-Tatarıstan ədəbi-mədəni əlaqələrinin möhkəmlənməsinə dəyərli töhfə olduğunu diqqətə çatdırıb.
Sonra Tatarıstanın Millət vəkili, Tatarıstan Yazıçılar Birliyinin sədri Rkail Zəydulla, hekayələrin tərcüməçisi Məleykə Mirzəli və dosent Məti Osmanoğlu kitabla bağlı fikirlərini bölüşüblər.
Sonda kitabın tərtibçiləri təltif edilib və oxucular üçün kitablar imzalanıb.
