Beynəlxalq Müəllimlər Gününə həsr olunmuş tədbir
BDU-nun Filologiya fakültəsində Tələbə Gənclər Təşkilatının təşəbbüsü ilə 5 Oktyabr - Beynəlxalq Müəllimlər Gününə həsr olunmuş tədbir keçirilib. Öncə Dövlət Himni səsləndirilib, ölkəmizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan Filologiya fakültəsinin sosial məsələlər və tələbələrlə iş üzrə dekan müavini Anar Fərəcov əlamətdar gün münasibətilə pedaqoji heyəti və gələcəyin müəllimlərini təbrik edib, onlara xoş arzularını çatdırıb.
Türkologiya kafedrasının dosenti, Əməkdar müəllim İslam Vəliyev 65 ildən yuxarı bağlı olduğu müəllimlik peşəsinin sirlərindən, xüsusilə Bakı Dövlət Universitetindəki elmi-pedaqoji fəaliyyətindən söz açıb, gənc pedaqoji kollektivə və gələcəyin müəllimlərinə öz təcrübələrindən danışıb, onlara vacib tövsiyələrini verib.
BDU-nun Karyera və məzunlarla iş sektorunun mütəxəssisi İlkin Şərifov universitetdə müəllim hazırlığı istiqamətində son dövrlər həyata keçirilən yeniliklərdən, BDU məzunlarının MİQ imtahanlarında, ümumiyyətlə, təhsil sektorunda əldə etdiyi nailiyyətlərdən bəhs edib. Sonra uzumüddətli səmərəli pedaqoji fəaliyyətinə görə Türkologiya kafedrasının dosenti İslam Vəliyevə Müəllimlər Günü münasibətilə hədiyyələr təqdim edib.
Tədbirdə Müəllimlər Gününə həsr olunmuş videoçarx nümayiş olunub, tələbələrdən Validə Bayramlının çıxışı dinlənilib, Hümbət Bədəlov isə müəllifi olduğu şeiri səsləndirib.
