BDU-nun Filologiya və Kimya fakültələrinin birgə təşəbbüsü ilə “Kitab bir mədəniyyətdir” adlı tədbir keçirilib
Fevralın 15-də BDU-nun Filologiya və Kimya fakültələrinin Tələbə Gənclər Təşkilatının birgə təşəbbüsü ilə “Kitab bir mədəniyyətdir” adlı tədbir keçirilib. “Microsoft Teams” platforması üzərindən təşkil olunmuş tədbiri Filologiya fakültəsinin III kurs tələbəsi Aytac Hüseynli giriş sözü ilə açıq elan edib.
Filologiya fakültəsinin Tələbə Gənclər Təşkilatının sədri Həsrət Emçiyev mütaliənin faydalarından, gənc nəslin kitablara olan marağının gücləndirilməsinin əhəmiyyətindən danışıb.
Sonra Filologiya fakültəsinin II kurs tələbələri - Gülər Əliyeva, Gülnaz Tağızadə, Kimya fakültəsinin II kurs tələbəsi Sevinc Həsənova və başqaları kitabın müasir cəmiyyətdə rolundan bəhs edib, insanların mənəvi inkişafına təsirindən söz açıblar.
Sonda Kimya fakültəsinin Tələbə Gənclər Təşkilatının sədri Əli Qədirli çıxış edərək, ixtisasından asılı olmayaraq bütün tələbələrin, ümumən müasir gəncliyin mütaliəyə olan marağının artmasının vacibliyini vurğulayıb, məruzəçilərə və iştirakçılara təşəkkürünü bildirib.
