Azərbaycan ədəbiyyatı tarixi kafedrasının sabiq professoru Nizaməddin Şəmsizadə vəfat edib
Nizaməddin Şəmsizadə 1954-cü il dekabrın 30-da Quba bölgəsinin qədim türk obası - İspik kəndində anadan olub. 1977-ci ildə Azərbaycan (indiki Bakı) Dövlət Universitetinin Filologiya fakültəsini bitirib. 1978-1990-cı illərdə AMEA Nizami Gəncəvi adına Ədəbiyyat İnstitutunda baş laborant (1978), kiçik elmi işçi (1981), baş elmi işçi (1986) vəzifələrində fəaliyyət göstərib. 1982-ci ildə namizədlik, 1990-cı ildə doktorluq dissertasiyaları müdafiə edib. 1985-ci ildən Azərbaycan Yazıçılar Birliyinin üzvü idi.
1990-cı ildən elmi-pedoqoji fəaliyyətini Azərbaycan Dövlət Mədəniyyət və İncəsənət Universitetində davam etdirən N.Şəmsizadə bu ali təhsil ocağında baş müəllim (1990), dosent (1991) və professor (1992) vəzifələrində çalışıb. 1991-2006-cı illərdə universitetin Ədəbiyyat və dillər, Ədəbiyyat və Azərbaycan dili, Ədəbi yaradıcılıq kafedralarının müdiri olub. 2002-ci ildə Tiflisdə Qafqaz Xalqları Elmlər Akademiyasının həqiqi üzvü seçilib. Elmi xidmətlərinə görə akademik Y.Məmmədəliyev mükafatı (2003) laureatı olub. “Heydər Əliyev və Azərbaycan ədəbiyyatı” (həmmüəlifli) kitabına görə Azərbaycan Respublikasının Dövlət mükafatına layiq görülüb (2010).
“Ədəbi proses - 78” (1980 həmmüəllifli), “Ədəbi mübahisələr” (1986), “Azərbaycan ideologiyası” (1996), “Azərbaycan ədəbiyyatşünaslığı” (1997), “Türk təfəkkürü məcrasında” (1998), “Hıçqıran gülüşlər” (2002), “Əli Nazim” (2003), “Rejissor taleyi” (2004), “Tənqidin ədəbi prosesdə rolu” (2004), “Böyük nəslin davamçısı” (2005), “Azərbaycançılıq” (2006), “Ədəbi proses və ədəbi nəsil” (2008 həmmüəllifli), “Yazıçı ömrünə uvertüra” (2010) monoqrafıyalarının, “Əgər onlar olmasaydı” (2015) ədəbi-tənqidi məqalələr kitabının, “Mən kiməm” (2015) adlı sənədli-fəlsəfi ömürnamənin, “Bürkü” (2003) hekayələr, “Tüstü” (2007) hekayələr və şeirlər, “Duman” (2010) şeirlər, “Müdriklər bunları deməyib” (2014) kəlamlar, “Səma” (2014) şeirlər, “Sonuncu daxma” (2014) hekayələr və esselər kitablarının, 250-dən çox ədəbi-tənqidi, elmi-nəzəri və fəlsəfi-publisistik məqalənin müəllifi olub. “Seçilmiş əsərləri” üç cilddə: I cild 2008-ci ildə, II cild 2010-cu ildə, III cild 2011-ci və “Nizaməddin Şəmsizadə: Biblioqrafıya” kitabı 2014-cü ildə “Elm” nəşriyyatında çap olunub.
N.Şəmsizadə bu gün ölkənin ali məktəblərində tədris olunan “Ədəbiyyat nəzəriyyəsi” (2012) adlı fundamental dərsliyin müəllifidir. N.Şəmsizadənin yaradıcılığı haqqında 80-dən artıq elmi məqalə, professor Ş.Vəliyevin “Azərbaycanşünas alim” (2004) monoqrafıyası və “Filosof tənqidçi” (2011) kitabı çap olunub. O, milli ideologiyamız - azərbaycançılıq nəzəriyyəsi haqqında ilk kitabın müəllifidir.
2007-2012-ci illərdə AMEA-nın Nizami adına Ədəbiyyat İnstitutunun Ədəbiyyat nəzəriyyəsi şöbəsinin müdiri vəzifəsində işləyib. 2013-cü ildən Azərbaycan Dövlət Mədəniyyət və İncəsənət Universitetinin Ədəbiyyat və dillər kafedrasının professoru kimi elmi-pedoqoji fəaliyyətini davam etdirib. 2017-2020-ci illərdə Bakı Dövlət Universitetinin Azərbaycan ədəbiyyatı tarixi kafedrasının professoru olub.
2019-cu ildə Bakı Dövlət Universitetinin 100 illiyi münasibəti ilə və Azərbaycanda təhsilin və elmin inkişafındakı xidmətlərinə görə Əməkdar elm xadimi fəxri adına layiq görülüb.
Allah rəhmət eləsin!