9 Noyabr - Dövlət Bayrağı Günü qeyd olunub
BDU-nun Filologiya, Beynəlxalq münasibətlər və iqtisadiyyat fakültələri üzrə BDU könüllüləri təşkilatının təşəbbüsü, “Lin-Orph” musiqi klubunun dəstəyi ilə 9 Noyabr - Dövlət Bayrağı Gününə həsr olunmuş tədbir keçirilib.
Tədbirdə Beynəlxalq münasibətlər və iqtisadiyyat fakültəsinin Beynəlxalq münasibətlər kafedrasının müdiri Kərəm Məmmədov və Filologiya fakültəsinin sosial məsələlər və tələbələrlə iş üzrə dekan müavini Anar Fərəcov açılış nitqi ilə çıxış ediblər.
Sonra Beynəlxalq münasibətlər və iqtisadiyyat fakültəsi üzrə BDU könüllüləri təşkilatının sədri Qasım Xəlilov Azərbaycan bayrağının yaranma tarixi və ideoloji məzmunu haqqında məlumat verib.
Filologiya fakültəsi üzrə BDU könüllüləri təşkilatının sədri Ayşə Quluzadə Azərbaycan ədəbiyyatında bayraq mövzusunda yazılmış şeirlərdə milli-mənəvi oyanışın tərənnümündən, poeziyamızda vətən, bayraq sevgisinin aşılanmasından söz açıb.
Tədbirdə tələbələrdən Aytac Salahlı və Arzu Əkbərova bayraq haqqında şeirlər səsləndirib, “Lin-Orph” musiqi klubunun üzvü Mənzər Əliyevanın ifasında “Çırpınırdı Qara dəniz” mahnısı dinlənilib, videoçarx nümayiş olunub.
