Humanitar fakültələr üzrə rus dili kafedrası 1919-cu ildə yaradılmış və ilk müdiri dosent P.O.Pilaşevski olmuşdur. 1939-cu ildə Filologiya fakültəsi bərpa olunarkən təşkil edilmiş kafedralar içərisində Rus dilinin praktik kursu kafedrası da yer almışdır. Həmin il kafedra müdiri vəzifəsinə professor H.Şaxtaxtinski təyin edilmişdir. 1949-1958-ci illərdə kafedraya f.e.n. M.V.Mirzəyeva, rəhbərlik etmiş, 1958-ci ildən kafedranın rəhbəri dos. Əhməd Mahmudov olmuşdur. 1964-cü ildə Rus dili kafedrası yenidən bərpa edilmiş və öz fəaliyyətini f.e.n. M.C.Mövsümzadənin başçılığı ilə davam etdirmişdir. 1967-1972-ci illərdə kafedra müdiri F.H.Hüseynov, 1972-1982-ci illərdə isə dos. F.T.Sultanzadə olmuşdur. 1982-2004-cü illərdə kafedraya professor A.R.Səmədova, 2004-2021-ci illərdə professor Ədibə Paşayeva rəhbərlik etmişdir. 2021-ci ildən kafedra müdiri dosent Tahir Əşrəf oğlu Əliyevdir.
Kafedra humanitar fakültələrdə rus dilinin tədrisini həyata keçirir. Son illər kafedra əməkdaşları çox sayda elmi məqalə, dərslik və dərs vəsaiti çap etdirmişlər.
Təbiət fakültələri üzrə rus dili kafedrası 1972-ci ildə vahid Rus dili kafedrasının bazası əsasında yaradılmışdır. Kafedraya müxtəlif illərdə dosent Rauza Məmmədbəyli (1972-1976), professor Türkan Əfəndiyeva (1977-1979), baş müəllim Qəzilə Qaziyeva (1980-1981), professor Aqil Hacıyev (1982-1984) rəhbərlik etmişlər. 1984-cü ildən kafedra müdiri Əməkdar müəllim, professor Mikayıl Məhəmməd oğlu Cəfərovdur. M.M.Cəfərov rus dilçiliyinin nəzəri məsələlərinə, rus dilinin tarixinə və tədrisinə dair 100-ə yaxın elmi-metodik əsərin müəllifidir. O, «Rus dilində sifətlərin sinonimliyi (mürəkkəb sözlərin materialı əsasında)», «XVII-XX əsrlər rus dilində mürəkkəb sözlərin struktursemantik inkişafı», «XVII-XX əsrlər rus dilində mürəkkəb sözlərin struktur-semantik inkişafı haqqında», «Rus dilində mürəkkəb sözlərin tarixinə dair oçerklər» monoqrafiyalarını, dosent F.Y.Hüseynova ilə birlikdə ali məktəblərin təbiət fakültələri üçün «Rus dili», təlimi Azərbaycan dilində olan məktəblərin VI sinfi üçün «Rus dili» dərsliklərini çap etdirmişdir.
